في مرة كان عندي بلد
أخدت سنيني في حضنها
نسيتني ايه وجع الشقا
واديتني فرح بيتولد
مع كل نسمة في فجرها
مين قدها في قلبي بقى
في مرة كان عندي بلد
فضلت تعافر في السنين
وتلملم الجرح الحزين
ودموعها عالخدين أنين
عمر الزمان من عمرها
في مرة كان عندي بلد
نيلها من الجنة اتقسم
وترابها تبر بيترسم
وعيون صباياها نغم
كبر في قلبي حبها
في مرة كان عندي بلد
في حضنها عشق الغريب
على أرضها اتهنى الحبيب
وحبها أجمل نصيب
اكمني دايبة في حبها
في مرة كان عندي بلد
مين اللي يقدر يوصفك
ولا حد يوصف ينصفك
بقلوبنا دايما نعرفك
بلدي اللي مافي زيها
وعشان كده أعظم بلد
ولأننا بنحبها ولا مرة
حتضيع البلد
د.نورهان بسيوني
